રેપ અને બ્લેકમેઇલના આરોપો વચ્ચે અભિષેક પોરેલ સામે હાઇકોર્ટનું કડક વલણ, ધરપકડનો આદેશ

IPL ટીમ દિલ્હી કેપિટલ્સ અને બંગાળના વિકેટકીપર-બેટર અભિષેક પોરેલ સામે નોંધાયેલા ગંભીર ફોજદારી કેસમાં કલકત્તા હાઇકોર્ટે પોલીસને તેમની તાત્કાલિક ધરપકડ કરવાનો આદેશ આપ્યો છે. આ મામલો એક મેડિકલ વિદ્યાર્થીનીની ફરિયાદ પરથી નોંધાયો છે, જેમાં લગ્નનું ખોટું વચન આપીને શારીરિક સંબંધ બાંધવા, મારપીટ, ગુનાહિત ધમકી અને અન્ય ગંભીર આરોપો લગાવવામાં આવ્યા છે.

ફરિયાદી યુવતીનો આરોપ છે કે અભિષેક પોરેલે લગ્નનું વચન આપીને તેની સાથે સંબંધ બાંધ્યો હતો. બાદમાં લગ્ન કરવાનો ઇનકાર કર્યો, મારપીટ કરી અને અંગત તસવીરો તથા વીડિયો જાહેર કરવાની ધમકી આપી હતી. ફરિયાદ બાદ કેસ નોંધાયો હતો, પરંતુ તપાસમાં વિલંબ થતો હોવાનો આક્ષેપ કરીને યુવતીએ હાઇકોર્ટનો દરવાજો ખખડાવ્યો હતો.

સુનાવણી દરમિયાન હાઇકોર્ટે કેસની ગંભીરતા ધ્યાનમાં લઈને પશ્ચિમ બંગાળ પોલીસને અભિષેક પોરેલ અને અન્ય એક આરોપીની તાત્કાલિક ધરપકડ કરવા તેમજ તેમના મોબાઇલ ફોન, લેપટોપ સહિત તમામ ઇલેક્ટ્રોનિક ઉપકરણો જપ્ત કરવાનો આદેશ આપ્યો છે. કોર્ટનું માનવું છે કે ડિજિટલ પુરાવા સુરક્ષિત રાખવા અને ફરિયાદીની ગોપનીયતા જાળવવા માટે આ કાર્યવાહી જરૂરી છે.

આ કેસની તપાસ હાલમાં મોગરા પોલીસ સ્ટેશન દ્વારા ચાલી રહી છે. કોર્ટએ તપાસ એજન્સીને આગામી સુનાવણી પહેલાં કાર્યવાહી અંગેનો વિગતવાર અહેવાલ રજૂ કરવાનો પણ નિર્દેશ આપ્યો છે. નોંધનીય છે કે આ કેસ હજુ તપાસ હેઠળ છે અને આરોપો અંગે અંતિમ ન્યાયિક નિર્ણય આવ્યો નથી.